அவியலும், பொரியலும் பின்னே சிக்கன் சிக்ஸ்டி ஃபைவும்

தலைப்பு லக்கிலுக்குக்கு சமர்ப்பணம்!

*************************

நீங்களும் கூட இதே மாதிரி அனுபவம் பெற்றிருக்கக் கூடும். அதாவது நான் எந்தக் கடைக்கு/ஷோரூமுக்கு போனாலும் அந்த கடைக்காரராய் என்னை நினைத்து யாராவது ஒரு வாடிக்கையாளர் என்னை கேள்வி கேட்பார்! 95% இடங்களில் எனக்கு இந்தமாதிரி நடக்கிறது! நேற்று ஒரு செகண்ட்ஸ் டிரஸ் மார்க்கெட் போனபோது ஒரு வாடிக்கையாளர் என்னிடம் சட்டையை எடுத்துத் தரச் சொன்னார். ஒன்றல்ல, இரண்டல்ல கிட்டத்தட்ட ஒவ்வொரு முறை அவர் சட்டையை தேர்வு செய்யும் போதும், அதை ஹேங்கரிலிருந்து எடுத்துக்காட்ட என்னை அழைத்தார். வெறுத்துப் போய் திட்டலாமா என்று நினைத்தேன். நாலைந்து முறைக்குப் பின் சொன்னார்...

“என் தம்பி யு.கே-ல படிக்கறான் சார். கொஞ்சம் உங்களை மாதிரியே இருப்பான். அதான் அடிக்கடி கூப்பிடணும்ன்னு தோணுது. தப்பா நெனைச்சுக்காதீங்க”

எனக்கு ஒரு மாதிரி ஆகிவிட்டது.

************************


இந்த மாதிரி அனுபவங்களில் பெஸ்ட், ஒருமுறை பல்டாக்டரைப் பார்க்கப் போனபோதுதான். பைக்கை நிறுத்திவிட்டு மாடியில் இருக்கும் அவரது க்ளினிக்குக்கு நடந்து போய்க் கொண்டிருந்தபோது அவசர அவசரமாய் பின்னால் வந்த ஒருவர் “டாக்டர்.. நேத்து என் பையனோட வயதுச் சான்றிதழுக்கு வந்தேன். இன்னைக்கு வரச் சொன்னீங்க. இப்ப கூட்டீட்டு வரட்டுங்களா?” என்று கேட்டார். கொஞ்சநேரம் அதை சந்தோஷமாய் கேட்டுவிட்டு அப்புறம்தான் நான் டாக்டரில்லை என்றேன்!

**********************

யெஸ். பாலபாரதிக்கு மணவாழ்த்துச் செய்தி சொல்லச் சொல்லி ஓட்டுப்பெட்டி வெச்சிருந்தேன். நல்லாயிரு தலைவான்னு 48 பேரும் (57%), மாட்டிக்கினியான்னு 29 (34%) பேரும், இனி நிறைய எழுதுவீங்களான்னு 15 (17%) பேரும், எப்ப பார்ட்டின்னு 33 (39%) பேரும் ஓட்டுப் போட்டிருக்காங்க. இதுல மூணாவது அண்ணி கைலதான் இருக்கு. நாலாவதுக்கு அவரே கூப்பிடுவாரு. தலைவா.. நல்லாயிருங்க!

*********************

இன்னொரு ஓட்டுப் பெட்டி வெச்சு, மேல படத்துல இருக்கறது யாருன்னு கேட்டேன். சுபாஷ் சந்திர போஸ்ன்னு 3 (4%) பேரும், சுக்தேவ்ன்னு 34 (48%) பேரும், பகத்சிங்ன்னு 19 (27%) பேரும், மதன்லால் திங்காரான்னு 14 (20%) பேரும் சொல்லியிருக்காங்க. இன்னும் ஒரு நாள் முழுசா இருந்தாலும் வாக்கு நிறுத்தப்படுகிறது. காரணம் வேற ஒண்ணுமில்லை. நானே மூணு நாலு ஓட்டுப் போட்டும் பகத்சிங்கை ஜெயிக்க வைக்க முடியல.  டர்பனெல்லாம் இருக்கேன்னாவது சிங்-ன்னு ஓட்டுப் போட்டிருக்கலாம்!


ஆமாம்.. அது பகத்சிங்! அந்த 19 பேருக்கு நன்றி!

***********************

நண்பர் ஒருவர் வெகுவருடங்களுக்கு முன் கோவை சென்றிருந்தபோது சந்தித்த ஒரு ஆட்டோ டிரைவரைப் பற்றி சொன்னார். ஆட்டோவில் ஏறும்போது பேசும் பணத்தை, இறங்கும்போது கொடுத்தால் ஐந்து ரூபாய் கம்மியாகத்தான் வாங்குவாராம். அதற்குப் பதிலாக “என் செல் நம்பர் தர்றேன் சார். எப்ப வந்தாலும் கூப்பிடுங்க” என்பாராம். நண்பர் யார் கோவைக்கு போனாலும் அந்த ஆட்டோக்காரரின் எண்ணைக் கொடுத்து ‘இவரு வண்டியிலயே போங்க’ என்பார். இப்போது அவர் இந்த அணுகுமுறையால் முன்னேறி மூன்று, நான்கு ஆட்டோக்களுக்கு சொந்தக்காரராய் இருக்கிறாராம்!


**********************

சில மளிகைக்கடை அண்ணாச்சிகளின் சின்னச் சின்ன தொழில் நுணுக்கங்கள் ஆச்சர்யப்படுத்தக் கூடியவை! வாடிக்கையாளர்கள் அரை கிலோ சர்க்கரை கேட்டால் கொஞ்சமாக தராசில் எடுத்துப் போட்டுவிட்டு, பிறகு டப்பாவிலிருந்து தராசிலிருக்கும் பொட்டலத்தில் கொஞ்சம் கொஞ்சமாக சேர்த்து நிறுத்துவார்கள். அப்படியின்றி, அதிகமாகப் போட்டுவிட்டு, தராசிலிருந்து எடுத்து தங்கள் மூட்டையில் சேர்ப்பது போல போடமாட்டார்கள். நின்று பார்த்துக்கொண்டிருக்கும் வாடிக்கையாளருக்கு மனதளவில் இது திருப்தி தரும். அதேபோல 25 பைசா, ஐம்பது பைசா பாக்கி இருந்தால் ஒரு ரூபாயாகக் கொடுத்துவிட்டு ‘அப்புறமா வரும்போது குடுங்க’ என்பார்கள்! கண்டிப்பாக அடுத்தமுறை அவர்கள் கடைக்கு போக வைக்கும் அந்த உத்தி!


*********************

இரண்டு நாட்கள் கொஞ்சம் பிஸி! பின்னூட்டத்துக்கு பதில் சொல்லக்கூட முடியறதில்லை. பிஸியா இருக்கற நாட்கள்ல பதிவெழுத நல்ல நல்ல மேட்டர் கிடைக்குதுங்கறது சந்தோஷம்!

*********************

ரொம்ப நாளாச்சு.. எனக்குப் பிடித்த கவிதை எழுதி...

இந்த வாரம் கல்யாண்ஜி

இந்தக் கவிதை எழுதுகிறவன்
பீங்கான் கழிப்பறைகளில்
பிளாஸ்டிக் குவளைகளில்
கொட்டிய தண்ணீரில்
கோடியில் ஒரு பங்காவது
ஊற்றியிருப்பானா
ஒரே ஒரு செடி
வேரடி மண்ணில்.